Balade 298 : Plus saiges est que Salemon (CCCII)
Balade
Plus saiges est que Salemon
Et plus riches que ne fut Crise,
Et dignes d’avoir grant renon,
S’il a estat qui lui souffise,
5 Maison, vivre, lit ou il gise,
Vestir, et ait pour lui chevir
Santé, pour son fait soustenir,
Sanz desirer autre chevance :
Telz homs vit bien au Dieu plaisir,
10 Ayons de ces points souvenance.
Grans richesces comme ot Noiron 67a
Ne firent pas que mors ne gise.
En son regne fut cruelz hom,
Sa renommee le desprise.
15 Sapience en Salemon mise
Ydolatra. Bon fait querir
Sanz moien au tel d’enrrichir
Et que chascuns ait souffisance.
Pensons que tous nous fault mourir :
20 Ayons de ces point souvenance.
Las ! que ont ly Roys et li baron
Plus de ceuls qui vont a la bise,
Fors un po de subjeccion
De peuples, qui leur est commise
25 De par Dieu ? s’ilz ont plus de mise,
Aussi ont ilz plus a souffrir,
Grant estat leur fualt soustenir,
Plus tiennent, plus ont de meschance.
Et au derrain fault tout fenir :
30 Ayons de ces poins souvenance.
L’envoy
Princes, de quanques nous avon
En ce monde, nous n’en porton
Un chascun, fors plaine sa pance
Et le bien fait, se fait l’avon.
30 Povre et riche, tuit y mourron,
Ayons de ces poins souvenance.
