Balade 283 : Lasse ! je voy pluseurs a la volee (CCLXXXVII)

Balade

Response de fortune

                        Lasse ! je voy pluseurs a la volee,
                        Qui cause sont de leur grant maleurté[1],
                        Eulx soubmettans, comme gent aveuglee,
                        Aux chetis biens de temporalité.
5                      Et la ont tant mis leur affinité
                        Qu’ilz n’en puelent leur penser remouvoir.
                        C’est ce qui fait, et par grant lascheté,
                        Lasche et moul cuer de son siege mouvoir.

                        Leur voulenté lasche est lors reboutee,
10                    Qui se soubmet a mondaine vilté.
                        Et a chose subjette et ordonnee
                        A homme vif, qui est ainsis venté
                        D’acquerir biens. puis l’infortunité
                        Par cas soudain lui retoult son avoir :
15                    Ainsis fait lors, et sanz necessité,
                        Lasche et moul cuer de son siege mouvoir[2].

                        Qui de telz biens, quant les pert, se desree
                        Et fait son cuer consentant tourmenté,
                        Lesquelz ne puet tenir longue duree,
20                    Car par la mort en est il debouté.
                        Telz biens soient de franc cuer redoubté.
                        Le bien parfait, souverain doit avoir,
                        Car souvent font vains biens, dont c’est pité,
                        Lasche et moul cuer de son siege mouvoir[3].

[1] Ms. maleureté

[2] Ms. remouvoir

[3] Ms. remouvoir