Balade 282 : Encontre toy, Fortune fortunee (CCLXXXVI)

Balade comment franche voulenté puet resister a tous les cas

                        Encontre toy, Fortune fortunee,
                        Bonne et male, fait Franche Volunté
                        Sçavoir a touz qu’elle est en homme nee
                        Pour empeschier toute ta pouesté.
5                      Ne nulz ne puet estre par toy tempté
                        Qu’il ne demeure en son propre pouoir,
                        S’en lui ne tient, tant l’aies tempesté.
                        Franc Cuer ne puet de son siege mouvoir.

                        Car Dieux lui a ceste vertu donnee
10                    Qui le maintient, se sage est, en planté,
                        Et lui oste toute autre destinee
                        Par Franc Vouloir, qui est en lui enté,
                        Et par lequel maint homme ont resisté
                        A toy, qui riens ne puéz contre valoir,
15                    S’il ne consent a ta chetiveté :
                        Franc Cuer ne puéz de son siege manoir.

                        C’est du hault lieu secret de sa pensee,                                             62d
                        Querans les biens de pardurableté,
                        Non pas du corps terriens forsenee
20                    Ou riens certain n’a fors que vanité.
                        Job monstra bien en son adversité
                        Que de telz biens ne doit a nul chaloir,
                        Des maulx soufrir, car, selon verité,
                        Franc Cuer ne puéz de son siege mouvoir.