Balade 280 : Sebille, tu de qui Saint Augustin (CCLXXXIV)
Balade
Sebille, [tu] de qui Saint Augustin,
En son livre de la Cité de Dieu,
Parle et conclut en tenant ceste fin
Qu’en la Cité as et doiz avoir lieu,
5 Car esperit de vraie prophecie
Eus, et des dix fus plus auctorisie,
Et qui parlas plus veritablement
Du Fil de Dieu, de sa mort, de sa vie,
Du cours du monde et du definement.
10 Tu aux Rommains, qui orent cuer enclin
De toy veoir, exposas le vray sieu
Des .ix. soulaulx. Ce fut respons divin
A leurs songes, qui moult furent terrien :
.iiii. regne tindrent la monarchie,
15 Or, My, Septen, l’occidental partie :
Second premier destruit dolentement :
Tiers, le second. Le quart nous certifie
Du cours du monde et du definement.
Du regne aux Gaulx, de leur foy, de leur lin
20 Parlas a droit, et de leur fin t’ensieu :
Quant ilz lairont de Dieu le droit chemin,
Et ne seront a justice ententieu,
Qu’Orgueil tendra entr’eulx la seignourie, 62b
Et Convoiter, Vaine Gloire essaucie
25 Sera partout trop magnifestement :
La vient leur mort, ta parole accomplie
Du cours du monde et du definement.
L’envoy
Prince des Gaulx, soit Pité vostre amie,
Honouréz Dieu et ne convoitéz mie.
30 Améz les bons et Justice ensement.
Fuiéz les foulz, et que droit vous charie,
Ou la fin voy de vo regne approchie,
Du cours du monde et du definement.
