Balade 279 : Uns saiges homs, considerans en soy (CCLXXXIII)
Autre Balade
Uns saiges homs, considerans en soy
Quel chose estoit a prince necessaire,
Qui a subgiéz, commandement et loy,
Et qui moult puet de biens et de maulx faire
5 Par son pouoir absolu, voluntaire.
Mais il conclut que de neccessité
Lui failloit gens qui deissent verité,
Pour son honour et pour leur conscience,
Sanz mal engin et sanz chetiveté,
10 Et que sur tout ait des bons congnoissance.
Ces deux poins fault principalement a Roy
Et a prince, qui veult a honour traire.
Par verité sera garni de foy
Et droiturier en fait judicïaire.
15 Durs aux mauvais, aux povres debonnaire,
A son dessus sera plain de pité,
Humble, courtois en son auctorité,
Fuie manteurs et leur perseverance,
Flateurs aussi, et gens d’iniquité,
20 Et que sur tout ait des bons congnoissance.
Mais au jour d’ui tout le contraire voy,
Car nul ne veult la verité retraire.
Ainz le mentir en pluseurs apperçoy,
Qui aux princes cuident par ce complaire.
25 En decevant, pour leur argent attraire, 62a
Leur consentent ordure et lascheté,
Et par Dieu ! c’est grant desloiauté.
Prince sur ce doit faire resistance
Et les pugnir, quant voit tel fausseté,
30 Et que sur tout ait des bons congnoissance.
L’envoy
Prince, qui veult vivre en felicité,
En l’amour Dieu, en honeur, en vaillance,
Doit cuers loiaulx tenir en grant chierté,
Et que sur tout ait des bons congnoissance.
