Balade 278 : Mieulx vault un bien souverain et parfait (CCLXXXII)
Balade
Mieulx vault un bien souverain et parfait
Que tous les biens fortunéz de Nature,
Qui tant de maulx ont a acquerir fait
Et font a ceuls qui y mettent leur cure.
5 Jour n’ont de bien, fors travail et froidure,
Autre heure chaut, pour telz biens acquerir,
Qui ne laissent reposer ne dormir,
Boire, manger, penser au sauvement.
Bien leur deust de ce mot souvenir
10 Que chascun muert et ne puet sçavoir quant.
Et aviser que, de nulz biens que homs ait
Temporelment, n’en est un seul qui dure,
Ne qu’om en puist porter que son bien fait,
Fors un vielz drap, sarcueil et sepulture
15 Quant il mourra. Et s’il a fait injure
A son vivant, sanz amer et chierir
Son Creatour, et ait voulu ravir
Les biens d’autrui, vivre mauvaisement,
Sa double mort doit et ce point cremir
20 Que chascun muert et ne puet sçavoir quant.
Mais cilz qui a soufisance en son fait,
Et qui des biens faulx et fuitis n’a cure,
Et qui de Dieu a de[1] s’amour refait,
Le cuer de lui prant douce nourreture.
25 Du corps ne craint ne mort ne pourreture.
Au bien parfait ou il tent de venir
Pense tousjours : c’est un doulz souvenir 61d
Qu’avoir tel bien puis son trespassement.
Or l’aquerons, et veillons advertir
30 Que chascun muert et ne puet sçavoir quant.
L’envoy
Prince, le bien fait nostre ame esjouir,
Et bon renom exemple maint enfent,
Le mal destruit : ce doit trop esbahir,
Que chascun muert et ne puet savoir quant.
[1] Ms. et de
