Balade 275 : Le poete nous deffent et le saige (CCLXXIX)
Balade avecques quelz gens on doit eschiver mariage
Le poete nous deffent et le saige 60d
Qu’avec trois gens ne faisons aliance
D’affinité par loy de mariage,
Pour ce qu’ilz ont perilleuse chevance :
5 C’est d’usurier, de prestre et d’avocat
Fille ou femme, et se nulz si embat
En pou de temps yert la chose mal mise,
Car tout se pert par sotie ou debat :
Tiers hoir ne jouist de chose mal acquise.
10 Car l’usure deffent Dieu et sur gaige
Prester a nul, et pour ce fait offence
Qui contre Dieu a de prester l’usaige,
Et li prestres qui lignie commence,
Ly advocas qui tousjours se debat
15 Et pour argent contre droit se combat.
Tous ces trois ci sont doleureuse prise
Et pour ce sont en brief tempoire mat :
Tiers hoir ne jouist de chose mal acquise.
Marions nous en loial heritaige
20 Bien acquesté, en lieu de congnoissance,
En bonnes gens et d’onneste parage :
Ne nous chaille d’excessive chevance,
Fors de bon corps, la vit on en esbat,
Et cela tient li avoirs en estat.
25 Tel chevance doit moult estre requise,
Des autres non qui se portent de plat :
Tiers hoir ne jouist de chose mal acquise.
L’envoy
Prince, en net lieu en corps de souffisance
Fait bon avoir sa chevance et franchise,
30 Ces .iii. dessus avoir en desplaisance.
Tiers hoir ne jouist de chose mal acquise.
