Balade 274 : Si com la nef qui en la mer chancelle (CCLXXVIII)
Balade du grant peril de Convoitise
Si com la nef qui en la mer chancelle, 60c
Quant il n’y a point de gouvernement.
Ou com les flos font plungier la nasselle
Par le tempest et par le souflement
5 De bise, auster et galerne ensement
Et de plugeau, ainsi tourne le monde
Par les mauvés qui en tiennent la bonde
Qui n’ont pitié fors de prandre et ravir
Les biens d’autrui : pour ce fault que tout fonde.
10 On ne pourroit Convoitise assovir,
Qui art maint cuer de crueuse estincelle.
Envie aprés fait grant embrasement.
Puis vient Orgueil plus tost qu’on ne l’appelle.
Oultrecuidier descongnoist telement
15 Soy et son fait, que c’est le droit tourment,
Qui les bons cuers et prodommes affonde
En ceste mer. Or fault que Dieux confonde
Telz confondeurs que chascuns doit hair.
Car brebiz n’est c’un chascun d’eulx ne tonde :
20 On ne pourroit Convoitise assovir.
Mais quant au fort, pour vent ne pour rochelle
Ne puet li fusts affonder nullement,
Car legers est, a port vient : cils ou celle
Qui le bien fait, treuve semblablement
25 Port de salut. Mauvais a dampnement
Vont en la fin : un temps le mal suronde,
Puis chiet du tout, et le bien fait habonde
Au derrenier, car Dieu le veult merir,
Pugnir le mal : chascun sur ce se fonde.
30 On ne pourroit Convoitise assovir.
L’envoy
Princes, bon fait avoir pensee monde,
Honourer Dieu craindre, amer et chierir,
Faire tout bien, sanz mal et chose inmonde :
On ne pourroit Convoitise assovir.
