Balade 272 : Pleure, Pité, et appelle Oroison (CCLXXVI)

Balade comment remors de conscience recongnoist et confesse ses pechiéz

                        Pleure, Pité, et appelle Oroison,
                        Pour ramener mon cuer a congnoissance,
                        Qui des pechiéz a fait trop grand foison.
                        Contricion me donne et repentence,
5                      Merci acquerre, avec perseverance                                                    60a
                        De faire bien et de Dieu obeir.
                        Humilité, fay moy Orgueil hair,
                        Et tous pechiéz. Trop ay esté mauvais.
                        Quant je me vueil de mes maulx repentir,
10                    Impetre moy pardon de mes meffais.

                        Fay Charité descendre en ma maison.
                        De resister m’octroie la puissance
                        Contre tout mal, et m’envoie Raison,
                        Pour enseignier et porter penitence.
15                    Escu de Foy me donne et une lance
                        De l’amour Dieu qui pour moy voult mourir.
                        Sa Passion me fay au cuer sentir,
                        Tant que de moy ne se parte jamais.
                        Grace requier. Vueilléz moi secourir.
20                    Impetre moy pardon de mes meffais.

                        Las ! j’ay commis larrecin, traison,
                        Envie, orgueil, paresce, oultrecuidance,
                        Glotonnie, luxure et desraison,
                        Murdre et ravir femme par violence,
25                    Sains lieux poluz, et en toute habondance
                        Faiz touz les maulx des quelz homs doit perir.
                        Justice et Loy ne m font que querir.
                        Jugieéz seray, se tu ne quier ma paix.
                        Pitié, pour Dieu ! va ma requeste offrir,
30                    Empetre moy pardon de mes meffais.