Balade 271 : Plus a li homs et plus veult aquerir (CCLXXV)
Balade
Plus a li homs et plus veult aquerir[1]
Et com plus a, plus lui croist maleurté[2],
Qu’en acquerant devient plus que martir. 59d
Paour lui vient. En riche povreté
5 Tout perdre craint, et n’a point de seurté.
Cilz qui les biens quiert hors de li estranges
De franc vouloir fait trop dolereus changes
Aux choses vilz, qui ainsi le font pestre.
Moult est frans cuers riche[3] et plains de loenges :
10 Nul n’est chetis s’il ne le cuide estre.
Car povres homs ne veult chose querir,
Qui empesche sa franche voulenté.
Il nasquit frans, pour ce veult frans mourir,
Et lui souffist que possibilité
15 Puist secourir a sa necessité
Sanz desirer tresors, avoirs ne granges.
Il est seur, il vit avec louenges[4]
Qui ainsi fait, soit clerc, lay, noble ou prestre.
Povreté n’a, et fust vestu de langes :
20 Nul n’est chetis s’il ne le cuide estre.
Mais cilz qui veult les faulx biens requerir,
Ou Fortune a maint chetif ahurté,
Beste devient, et ne fait que languir.
Et s’il les pert, il a toute durté.
25 Homs puet en soy trouver bonneur[e]té
Si lui souffist aoust, moissons, vendenges,
Et eschiver paour, honte, laidenges
Qui leur puelent par son convoiter nestre.
Hé ! convoiteux, de ces faulx biens t’estranges :
30 Nulz n’est chetis s’il ne le cuide estre.
[1] Ms. aquerre
[2] Ms. maleureté
[3] Ms. riches
[4] Ms. les louenges
