Balade 270 : Vicaire Dieu, commis ou temporel (CCLXXIII)
Autre Balade
Vicaire Dieu, commis ou temporel
Oint et sacré de sa saincte uncion,
Qui au jour d’ui t’a fait en ton hostel
Hoir mascle avoir pour ta succession
5 Continuer, congnois l’afeccion
Grace et amour que Dieu te fait et donne
Pour succeder ton hoir en la couronne :
Com de Saul ta lignie n’efface.
Or le congnois, sers, honoure, et guerdonne :
10 Au peuple fay remission et grace.
Considere toy estre homme mortel :
L’un de l’autre ait pitié, compassion.
Pour acquerir regne perpetuel
Et que tous temps puist durer ta maison,
15 Fay charité, garde droit et raison.
Des biens de Dieu a ton peuple redonne.
Pugnis les maulx, aux ignorans pardonne.
Et ne soit nul qui aux povres mefface.
En bon estat tien toujours ta personne :
20 Au peuple fay remission et grace.
Ayme et deffen le bien esperitel,
Et pour honeur de ceste nascion
Edifier fay de paix un autel.
Du jou pesant fay relaxacion
25 Pour vie avoir et augmentacion
A ton vray hoir, fay quelque chose bonne.
A son venir ta clemence habandonne,
Comme Dieu fist pour sauver nostre estrace.
Retien ces mos, met a œuvre et les sonne :
30 Au peuple fay remission et grace.
L’envoy
Princes, hui a grant joye ta region.
Et maint ont fait tresdevote orison 59b
Afin d’avoir heritier, qui leur face
Amour, Douçour, Droit et Deffencion :
35 Exauciéz sont. Pour ce en conclusion,
Au peuple fay remission et grace.
