Balade 267 : Il n’est delit, joie, feste, soulas (CCLXX)

Autre Balade

                        Il n’est delit, joie, feste, soulas,
                        Joustes, tournois, deduit, esbatement,
                        De quoy chascuns ne soit a la foiz las,
                        Combien que tout plaise au commencement.
5                      Continuer telz choses longuement
                        Engendre ennui ou quelque desplaisance.
                        Estudier n’a pas ce mouvement :
                        Car tout desplaist fors estude et science.

                        Et ce puet on veoir en pluseurs cas.
10                    Chascun le scet, qui a entendement.
                        De grans festes dient pluseurs « Helas ! »
                        Et des deliz de chacier ensement,
                        Et de voler et de tournoiement,
                        De dame avoir et de mener la dance :
15                    Vanitéz sont, croy donc certainement :
                        Car tout desplaist fors estude et science.

                        Mais plus vit homs et plus passe le pas
                        De l’aage humain, plus quiert diligenment
                        L’art de sçavoir, dont il veult faire un tas.
20                    De jour en jour croist l’estudiement,                                                  58c
                        Sanz lui lasser et continuelment,
                        Pour acquerir renommee et prudence.
                        Mais trop petit lui chaut du remanent :
                        Car tout desplaist fors estude et science.

                        L’envoy

25                    Prince, qui a terre et gouvernement
                        Doit voulentiers aprandre des s’enfance,
                        Pour soy garder et vivre saigement :
                        Car tout desplaist fors estude et science.