Balade 268 : Les serfs jadis achaterent franchise (CCLXXI)

Balade

                        Les serfs jadis achaterent franchise
                        Pour estre frans et pour vivre franchis,
                        Car li homs serfs est en autrui servise
                        Comme subgiéz en servitute chis.
5                      Mais quant frans est, il est moult enrrichis
                        Et puet partout aler ou il lui plaist,
                        Mais ce ne puet faire li homs[1] asservis,
                        Pour ce est li homs eureus qui frans se paist

                        Donc est bien foulz et fole qui est chise
10                    En serf lien d’estre femme et maris,
                        Car puis que homs est prins et femme prise
                        Par marïer, chascuns est esbahis :
                        S’omme est seigneur, femme tence toudis,
                        Pour son baron nulle foiz ne se taist.
15                    En asservant sont dolens et chetis :
                        Pour ce est li homs eureus qui frans se paist,

                        Et qui se tient franchement a sa guise
                        Sanz marier, comme pluseurs chetis
                        Qui languissent, et tout par convoitise
20                    De femme avoir, pour son corps ou pour pris.
                        Car se femme a, tant comme il sera vis,
                        Lui fault avoir chose qui lui desplaist,
                        Femme, qui est ses mortelz ennemis :
                        Pour ce est li homs eureus qui frans se paist.                                   58d

[1] Saint Hilaire corrige en uns homs