Balade 259 : Pluseurs saiges sont au monde tenuz (CCLXII)

Balade

                        Pluseurs saiges sont au monde tenuz
                        Qui ne dient et ne preschent que sens.
                        Mais povres sont et de sens faire nus,
                        Chetis, oiseus, soufraiteus et dolens.
5                      Ilz ont le miel en la bouche et es dens
                        Dont ilz ne scevent gouster.
                        Ce qu’ilz dient deussent assavourer
                        Et tous leurs faiz conjoindre a la parole.
                        Mais riens n’en font. Autrui scevent[1] ouvrer :                                    56c
10                    C’est droictement la pie qui parole.

                        Autres se sont simplement maintenuz,
                        Qui au parler semblent trop ignorans
                        Et en habit rudes et malostruz,
                        Qui en leurs fais sont tant et clers veans,
15                    Qui parlent pou. Mais ilz sont premeens
                        A bien faire et labourer,
                        A Dieu servir, a chevance amasser,
                        Et leur chaut pou qui les garde ou rigole.
                        Et les autres ne veulent que jangler :
20                    C’est droictement la pie qui parole.

                        Il vauldroit mieulx a uns homs estre mus,
                        Et [que] il fust bons, sutils et diligens,
                        Que de prescher les biens et les vertus
                        Et il fust du faire negligens.
25                    Mieulx vault bien faiz et bon gouvernement
                        Que le saigement parler.
                        Homme sanz fait doit on pou honourer
                        Puis qu’il ne fait le bien de son escole,
                        Car sanz bien fait vault po son sermonner :
30                    C’est droictement la pie qui parole.

[1] Ms. louvent