Balade 258 : Tu qui en toy as tant de hardement (CCLXI)

Balade comment on puet escheler paradis

                        Tu qui en toy as tant de hardement,
                        Et qui te veulz aux armes esprouver
                        Pour terre avoir et los mondainement
                        Qui ne te puet qu’a ta vie durer,
5                      Ou il te fault tant de paine endurer
                        Et de pechiéz acquerir,                                                                         56b
                        De faim, de froit, de rober, de murdrir,
                        Je t’aprandray chose plus honourable
                        Dont tu pourras les sains cieuls conquerir
10                    Et heriter en regne pardurable.

                        Croy un seul Dieu et l’ayme entierement,
                        Qui fist le ciel, gens crea, terre et mer.
                        Ton proesme aime com toy semblement,
                        Et se tu veulz Paradis escheler,
15                    Bien faire fault, bien dire et bien penser :
                        Par celle eschielle venir
                        Puéz [la] au lieu qui ja ne puet fenir,
                        Ou il a gaing et avoir proufitable.
                        Par ces .iii. poins puéz vivre sanz mourir
20                    Et heriter en regne pardurable.

                        .iii. degréz sont qu’en piet legierement
                        Faire ça jus, sanz soy desordonner,
                        Et s’en puet on de terre ou firmament
                        En po d’eure joieusement monter.
25                    Mais par ces trois a rebours descompter
                        Puet on en enfer cheir
                        Et soy meschant a tousjours mes veir
                        Ou feu ardant, penible et tourmentable.
                        Fui le rebours. Le droit vueilles tenir
30                    Et heriter un regne pardurable.