Balade 257 : Du droit du ciel fut franche creature (CCLX)

Autre Balade

                        Du droit du ciel fut franche creature,
                        Mais du marchié sont pluseurs asservis :
                        En convoitant injurent leur nature,
                        Et par les biens terriens sont ravis,                                                    56a
5                      Jamais nul jour ne seront assovis
                        Et ainsi par convoitise,
                        Se randent serf et delaissent franchise
                        Si que joie ne puelent percevoir.
                        Saiges est donc qui sur ces poins s’advise :
10                    Noble chose est que de franchise avoir.

                        Qui sert, il a moult de soing et de cure.
                        Se femme prant, d’acquerre art trestous vis.
                        S’il est marchant trop a grief pointure,
                        Et se il est gouverneur d’un pais,
15                    Il est souvent de pluseurs envahis,
                        Et s’il a foison de mise,
                        Lors li sera mainte doleur amise
                        Et lui faurra laissier de son avoir.
                        Qui asséz a franchement, lui souffise,
20                    Noble chose est que de franchise avoir.

                        Car cil qui a souffisance et mesure
                        Et vit du sien par bon et bel advis,
                        Il est peuz de douce nourreture,
                        Mais qu’en lui soit Dieu loéz et servis,
25                    Et si est hors de mains mortelz peris.
                        Car il vit par bonne guise,
                        Joieusement, et li sers homs se brise
                        Que folie fait ainsi decepvoir
                        Et tristement le maine a son juise :
30                    Noble chose est que de franchise avoir.