Balade 256 : Deceus est tout le monde au jour d’ui (CCLIX)

Balade comment chascun se deffait en son estat au jour d’uy

                        Deceus est tout le monde au jour d’ui,
                        Car chascuns veult grant estat maintenir,
                        Et si n’est mes aussi comme nullui,
                        Pour les labours du secle maintenir.
5                      Chascun deust son estat retenir,
                        Sanz honte avoir de faire son mestier.
                        Mais chascuns veult escuier devenir :
                        A paine est il au jour d’ui nul ouvrier.

                        C’est ce qui fait chierté, faulte et ennui,
10                    Prandre, pillier, desrober et ravir,
                        Les gens tuer et vivre de l’autrui,
                        Guerre esmouvoir, feu bouter et trair.
                        Helas ! qu’om doit telz oiseuses hair !
                        L’en devroit bien telz larrons justicier
15                    Et contraindre de leur mestier tenir :
                        A paine est il au jour d’ui nul ouvrier.

                        Les haulz princes dont recordéz me sui,
                        Le temps passé, vouldrent sens acquerir.
                        Le peuples ouvroit lors, si comme je lui,
20                    A divers ars failloit chascun offrir.
                        Adonc avoit pou le monde a souffrir.
                        Tous biens furent sanz l’autrui convoitier.
                        Autrement va, nul ne daigne servir :
                        A paine est il au jour d’ui nul ouvrier.