Balade 255 : Quant j’ay bien tout consideré (CCLVIII)

Balade

                        Quant j’ay bien tout consideré,
                        Les estas du monde present,
                        Et les cours[1] ou j’ay demouré
                        Et la maniere de la gent,
5                      L’un est riche et l’autre indigent
                        L’un se faint, l’autre en vain se crout
                        Bon se fait porter loyaument,
                        Car au derrain le bien vaint tout

                        Qui plus a, plus est acouré
10                    Et plus lui fault mises d’argent :
                        Telz a terres et champ labouré,
                        Qui n’a c’une povre jument,
                        Qui mieulx vit et plus liement
                        Que telz siet a table au hault bout.
15                    Bon fait vivre moiennement,
                        Car au derrain le bien vaint tout.

                        Que vault grant avoir amassé
                        Dont il fault faire testament,
                        Et recorder le temps passé
20                    De l’acquest fait mauvesement ?
                        Dont l’en a eu paine et tourment.
                        Pandre ou rendre fault[2], je n’en doubt.
                        Saiges est qui vit nettement,
                        Car au derrain le bien vaint tout.

                        L’envoy

25                    Princes, qui plus riches se sent
                        En ce monde est li plus dolent
                        Quant de mort lui vient le sanglout.
                        Mais cil qui souffisance prent
                        Et fait bien, fine sainctement,                                                             55d
30                    Car au derrain le bien vaint tout.

[1] Ms. cuers

[2] Ms. faut il