Balade 250 : Quant Julius Cesar, dus des Romains (CCLIII)

Balade comment les consaulx des Françoys sont trop longs et mal executez selon eur sens

                        Quant Julius Cesar, dus des Romains,
                        Vint en Gaule la terre conquerir,
                        Un jour loga entre Soissons et Rains,
                        Sur un hault mont. Mais pour lui requerir,
5                      De Senliz et de Nevers,
                        D’Arras, Noyon et des pais divers,
                        Vont les princes pour lui contrarier.
                        Lors a ses gens dist : « Soyéz hui appers :
                        François perdent leur temps a conseillier. »

10                    Car les Galois venoient par les plaines
                        A grant desroy, puis[1] quant virent yssir
                        Les gens Cesar, entr’eulx [se sont] restrains,                                     54c
                        Et au conseil veissiéz chascun fuir.
                        Lors dist : « Ceuls seront nos sers.
15                    A conseillier sont ces Galois expers,
                        Mais ne scevent leurs consaulx exploitier.
                        Feréz en eulx : soiéz vistes et vers,
                        François perdent leur temps a conseillier. »

                        Ainsi fut il et est, si com je tiens.
20                    Leurs longs consaulx en a fait maint perir.
                        Encor fera, si com je sui certains.
                        Executeur fault en armes querir.
                        Ce n’est pas mestier de clers.
                        S’on n’y pourvoit, royaumes, tu te pers.
25                    Un cuer vaillant puet ton fait radrecier,
                        Sinon partout sera cilz mos dispers :
                        « François perdent leur temps a conseillier ».

[1] Ms. et puis