Balade 249 : Angoisses sont amoy de toutes pars (CCLII)
Balade comment le chief et les mambres doivent amer l’un l’autre
Fable
Angoisses sont a moy de toutes pars
Quant les membres voy au chief reveler,
Et le chief voy sortir divers regars,
Et qu’il convient l’un a l’autre mesler,
5 Le pere au fil, seignour son serf tuer,
Ville gaster et destruire pais
Par le default de raison regarder.
Merveille n’est se j’en suis esbahis.
Le chief ne doit des membres estre espars,
10 Mais le doivent nourrir et gouverner.
Le chief leur doit aprandre les doulz ars,
Et cautement sur ses membres regner.
Se ilz meffont, il doit son droit garder 54b
Moiennement, puis qu’ilz se sont subgis :
15 Se lors les veult jusqu’a mort subjuguer,
Merveille n’est se j’en suy esbahis.
Quant jambe et piet seront destruit et ars,
Que feront mains et bras, au paraler[1] ?
Ventre mourra, li chiefs pour mille mars
20 Ne pourroit pas ses membres recouvrer.
L’un sanz l’autre ne puet longues durer.
Qui saiges est sur ces poins ait avis,
Car quant je voy sur ce pluseurs parler,
Merveille n’est si j’en sui esbahis.
L’envoy
25 Princes, li chiefs doit ses membres amer,
Et contre droit ne les doit entamer,
Et le chief doit d’eulx tous estre obeis.
S’il a besoing, ilz lui doivent aidier.
Mais quant je voy chief et membres troubler,
30 Merveille n’est si j’en suis esbahis.
[1] Ms. parler
