Balade 248 : Ysoppe dit en son livre et raconte (CCLI)
Balade comment en doulz parler a maintefois deception
Fable
Ysoppe dit en son livre et raconte
Que la rayne[1] parla a la souris
Moult doucement, et la souris lui compte
Que grant famine avoit en son pais.
5 Pour ce voult une riviere
Passer a no, mais n’en sçot la maniere,
Et la rayne lui respont : « Douce amie,
Je vous lieray a mon pié par derriere. »
Qui legier croit, certes c’est grant folie.
10 La rayne lors, qui ne pensa qu’a honte,
La souriette a liee de fis.
En fleuve entra, la se plunge et affonde
Pour la noier. mais uns escoufles vis
Les happa : la fut leur biere.
15 […][2]
Barat toudis les barateurs conchie, 54a
Ces deux destruit faintis en douce chiere :
Qui legier croit, certes c’est grant folie.
A dire voir, ainsi est il au monde
20 Ou pluseurs sont de bouche bons amis,
Qui promettent l’un l’autre[3] passer l’onde,
Mais leurs cuers sont tresmortelz ennemis.
L’un tire avant, l’autre arriere.
L’un cuide entrer, l’autre lui fait barriere.
25 Puis vient sur eulx qui toudis les chatie.
Advise ci chascuns a ma priere :
Qui legier croit, certes c’est grant folie.
L’envoy
Prince, quant cuers ne s’acordent aux dis
Estre ne puet nulz plus mortelz perils.
30 Mainte cité en a esté perie,
Mais Roys destruis, mains[4] royaumes peris.
Bon fait ouvrer par sens et par advis :
Qui legier croit, certes c’est grant folie.
[1] Ms. l’arrayne
[2] Vers non édité ou vers manquant non signalé.
[3] Ms. a lautre
[4] Ms. et mains
