Balade 247 : Au Roy supplie Eustaces humblement (CCL)

Balade de la supplication faicte au Roy par Eustace

                        Au Roy supplie Eustaces humblement
                        Que comme il ait vostre pere servi,
                        Huissier d’armes jadis treslonguement,
                        Et vostre tante en Lombardie aussi,
5                      Duc, Duchesse d’Orleans autressi,
                        Et pour ce lui eust donné
                        Gaiges le Roy pour estre guerdonné,
                        A sa vie certaine pension.
                        Qu’il vous plaise, seigneur tresredoubté,
10                    Retenue ait et confirmacion.

                        Voz ancesseurs a servi longuement,
                        Et tout son temps employé jusques cy.
                        Et si est vray que derrenierement                                                       53d
                        L’ont les Anglois tout ars et tout brui
15                    Emprés Vertus. Aiéz pitié de lui.
                        .ii. m. frans et plus lui a cousté
                        Ceste guerre, dont il est deserté,
                        Se de vous n’a remuneracion :
                        Si vous requier pour fuir povreté,
20                    Retenue ait et confirmacion.

                        .v. sous .iiii. a anciennement,
                        Qui sont pour jour a huissier establi,
                        Et pour robe a cent soulz annuelment,
                        Mais li varlet sont trestuit parisi.
25                    L’en le paioit chascun an sur Vitri.
                        Or soit par vous commandé,
                        Sa lettre aussi com nouveau don donné,
                        Et qu’om le paye sanz contradicion,
                        Et de grace que le povre brullé
30                    Retenue ait et confirmacion.