Balade 246 : De .vii. païs tendra la seignourie (CCXLIX)
Autre Balade des terres madame de Bourgoigne venues en son costé
De .vii. païs tendra la seignourie
L’une des fleurs et branche des François,
Naturelment, se Dieux lui donne vie,
Ou ses enfans qui sont gens et adrois :
5 C’est Bourgogne, Flandres, Brebant, Artois,
Rethel, Nevers autressi,
De Bourgongne la conté, et aussi
Salins, Anvvers, ara en sa puissance
Et Malignes, de femme et de par lui
10 Philippes ducs, filz de Jehan, Roy de France.
De par lui vient la premiere partie : 53c
C’est la duchié de Bourgogne, ses drois,
Qui en freraige a esté departie,
Ainsi le voult nostre sires li Roys.
15 Mariéz fult haultement a son chois,
Grillequine ot, puis plevi
Qui de Loys, conte de Flandres yssi,
De Marguerite de Brebant, sanz doubtance :
De ce costel sera moult seignouri
20 Philippe duc, filz de Jehan, Roy de France.
Or le gart Dieux et sa noble lignie,
Jehan mon seigneur et ses enfans touz trois,
Ma dame aussi, et que sanz villenie
Puissent regner comme frans et courtois,
25 Et en tous lieux si maintenir leurs lois
Qu’améz soient et chieri,
Et de leur pueple en tous cas obei,
Si qu’entr’eulx n’ait ja rumour ne grevance :
Ainsi sera noblement enrrichi
30 Philippe duc, fils de Jehan, Roy de France.