Balade 245 : De jour en jour, de sepmaine en sepmaine (CCXLVIII)
Balade
De jour en jour, de sepmaine en sepmaine,
De mois en mois et d’annee en annee,
De mal en pis le monde se demaine.
Ne je n’y voy a creature nee
5 Joie sentir, fors dure destinee,
Courroux avoir. Et un point que j’avise,
C’est qu’entre touz court voix et renommee
De pis avoir pour le pueple et l’Eglise.
L’un vers l’autre desloiaument se maine, 53b
10 Aux mauvais est la terre habandonnee.
L’un ravist tout, l’autre pert son demaine,
Peuples s’esmuet, l’Eglise est subournee.
Noblesce fault, tant est mal ordonnee,
Que nul des trois ne s’aime ne se prise,
15 Dont il s’ensuit chose determinee
De pis avoir pour le pueple et l’Eglise.
Et quant je voy que creature humaine
A repentir n’a bien faire ne bee,
Et que tousjours nous croist doleur et paine,
20 Par le deffault de vertu reboutee,
J’ay reconfort du temps, en ma pensee,
Qui court, pour ce que chascun prophetise
Plus grant doleur estre prenostiquee
De pis avoir pour le peuple et l’Eglise.
L’envoy
25 Prince, qui veult que le bon temps reviengne
Les .iii. estas en bonnes meurs repraingne,
Et que nul seul des trois ne se desguise.
Un chascun d’eulx son droit estat maintiengne,
Car l’exceder est monstre et droicte enseigne
30 De pis avoir pour le peuple et l’Eglise.
