Balade 244 : Dieux absoille le bon Roy trespassé (CCXLVII)
Autre Balade
Dieux absoille le bon Roy trespassé,
Et Dieux consault cellui qui est en vie !
Il me donna rente le temps passé,
A mon vivant, laquelle je n’ay mie.
5 J’ay .xiiii. ans sui royal lignie
Sanz acquerir fors que .v. sous par jour,
Usé mon temps, ma jonesce perie : 53a
Mais du papier n’y sçay voie ne tour.
De poursuir sui honteux et lassé.
10 Le Roy voulsit ma chose estre acomplie !
Les Angles m’ont ars, destruit et degasté.
Et parlement par plait me contrarie.
En don du Roy a mis debat partie
Que confermé m’avoir sur une tour,
15 Dont je sui hors. Monstréz vo seignourie :
Mais du paier n’y sçay voie ne tour.
Toudis ont tout ceuls qui ont amassé.
Les povres rien : pour ce au Roy supplie
Que de son don soie recompensé.
20 L’en me promet, mais comment qu’om me die :
« Paiéz seras », le conseil se varie.
Autant sui seur qu’a la bouche d’un four,
J’ay tout perdu, ma fournee est bruie :
Mais du paier n’y sçay voie ne tour.
L’envoy
25 Prince de qui la parole est oye
En promettant jamais ne la desdie,
Car il seroit forment contre s’onnour.
Promette[1] po, soit sa main eslargie,
Tiengne son don ou son parler folie,
30 Mais du paier n’y sçay voie ne tour.
[1] Ms. promettre
