Balade 243 : Je faiz toudis mieulx que puis, et feray (CCXLVI)
Balade
Je faiz toudis mieulx que puis, et feray,
Mais petit puis, fors bonne voulenté.
Verité vueil, et tous temps dicte l’ay
Qui vers pluseurs engendre inimisté.
5 Mais de Dieu vault mieux avoir l’amisté 52d
Pour dire voir que du monde la grace,
Quant par mentir vient tele affinité.
Au jour d’ui voy po qui bien n’oneur face.
J’ay moult servi, mais nul gueredon[1] n’ay
10 Fors que labour, paine et adversité,
User le mien et dire : je feray.
Sanz acomplir sui ainsi tourmenté.
Viellesce vient. Las ! cil qui est renté,
Son grant tourment et sa paine pourchace.
15 Qui serf se fait, destruit est et gasté.
Au jour d’ui voy po qui bien n’oneur face.
A tous m’en dueil, mon temps perdu plourray.
Fuiéz la court, qui dictes Verité,
Laissiéz servir .viii. dames que je sçay,
20 Desloiauté, Faintise, Iniquité,
Mesdit d’autrui, Traison, Fausseté,
Dissimuler, Mentir avec leur trace,
Glotonnie, Orgueil, Haultenneté.
Au jour d’ui voy po qui bien n’oneur face.
L’envoy
25 Prince, a court sont ceuls que nommé vous ay
Communement, qui y mainent grant glay,
Qui ont banny Franchise, Amour et Grace,
Bien et Honeur, Vaillance et son essay,
Congnoissance, Charité. Si diray :
30 Au jour d’ui voy po qui bien n’oneur face.
[1] Ms. guerdon
