Balade 242 : Pour quoy est si obscurs le temps (CCXLV)

Balade comment on ne se congnoist au jour d’uy es esta qui rengent

                        Pour quoy est si obscurs le temps
                        Que li uns l’autre ne congnoist,
                        Mais muent les gouvernemens                                                            52c
                        De mal en pis, si comme on voit ?
5                      Le temps passé trop mieulx valoit.
                        Qui regne ? Tristesce et Ennuy.
                        Il ne court justice ne droit :
                        Je ne scé mais des quelz je suy.

                        Partout voy riote et contens,
10                    Et la guerre ou la paix estoit.
                        Le pere se mesle aux enfans,
                        Ne nul ne fait mais ce qu’il doit.
                        Li frere son frere occiroit,
                        La mere sa fille au jour d’ui,
15                    Li sens son seigneur trahiroit :
                        Je ne sçay mes des quelz je sui.

                        Je tien que c’est deffault de sens
                        Et Convoitise nous deçoit,
                        Amour fault entre les presens,
20                    Autrement riens ne se perdroit,
                        Et Dieu nous veult pugnir a droit
                        Par nous meismes, non par autrui.
                        Nul bien n’y voy, en lui en soit !
                        Je ne sçay mais des quelz je sui.

                        L’envoy

25                    Prince, selon ce que je sens,
                        Rebellions et mouvemens
                        Par pechié nous font trop d’ennui.
                        Die chascuns : je me repens.
                        Il ne court que triboullemens :
                        Je ne sçay mais des quelz je sui.