Balade 241 : Chascuns se devroit bien garder (CCXLIV)

Balade comment le mortier sent tousjours les aulx

                        Chascuns se devroit [bien] garder,                                                     52b
                        Pour nourrir sa complexion,
                        De son contraire demander,
                        Ne de faire habitacion
5                      O gens de male entencion.
                        Car cil qui est une foiz faulx
                        Change envix sa condicion :
                        Tousjours sent le mortier les aulx.

                        C’est taiche qu’on ne puet laver
10                    Pour sa grant putrefaction,
                        S’en convient le goust demourer
                        Qui engendre corrupcion.
                        Ainsi, selon m’oppinion,
                        Renchiet tost mauvais en ses maulx,
15                    Quant il n’en a correction :
                        Tousjours sent le mortier les aulx.

                        Bon fait tel peril eschiver
                        Et d’y mettre provision,
                        Tant qu’om ne se face huer,
20                    Et qu’om tiengne en subjection,
                        Pour doubte de rebellion,
                        Les mauvais et les desloyaulx,
                        Sanz faire grant remission :
                        Tousjours sent le mortier les aulx.

                        L’envoy

25                    Princes, dissimulacion
                        De pugnir fait l’election
                        Des mauvais traistres ribaulx.
                        Pour ce di en conclusion :
                        Pandéz, faictes pugnicion,
                        Tousjours sent le mortier les aulx.