Balade 240 : Las ! je me plain, destruite et desolee (CCXLIII)
Autre Balade
Las ! je me plain, destruite et desolee :
Tout le monde me fait sedicion.
Je fus jadis saincte Eglise appellee.
Pierres et Polz par predicacion,
5 Par ferme foy, par operacion, 52a
Par euvre de charité,
Par dire voir, par soufrir povreté
Firent a moy mains peuples convertir,
Et de la loy paienne departir,
10 Tant que pour moy furent lors decolé.
Mais a present mon fait est desolé :
Nulz ne veult mais pour moy estre martyr.
Lors et depuis fu long temps honouree,
Car li apostre en grant devocion
15 Desquelz la char a esté martiree
Preschierent Dieu en toute region,
L’advenement, mort, resurrection,
Garissans par leur saincté
Maint languereus. Maint mort resuscité
20 Fut lors par eulx qui tout voulrent soufrir
Pour Verité et pour Foy soustenir.
Dont maint pais fut par eulx conquesté.
Autrement va. Chascun quiert Vanité :
Nulz ne veult mes pour moy estre martir.
25 Synaguogue puis estre figuree.
My sers en moy font fornicacion,
Pour moy occir, contendent a l’espee,
Et de mes biens font vil vendicion.
O vray espoux, envoie de Syon
30 Par ta grant benignité
Des faulx mauvais venger l’iniquité
Qui en touz cas vont au Sathan servir,
Et ne vueilles moy t’espouse guerpir
Ne remanoir ou tele adversité,
35 Ains me secours, doulz Dieux, par ta pité :
Nulz ne veult mes pour moy estre martir.
