Balade 239 : Grace, et honeur, paix, joie et paradis (CCLXII)

Autre Balade

                        Grace, et honeur, paix, joie et paradis,                                               51d
                        Santé de corps, vertu de longue vie,
                        Plenté d’avoir, l’amour de voz subgis,
                        Force et beauté, prudence et seignourie,
5                      Jouir d’amours, pris de chevalerie
                        Vous vueille Dieux ottroier
                        Et vous face la fleur des fleurs crier,
                        Tant que de vous soit partout renommee.
                        Si c’om vous puist a droit comparagier
10                    A Josué, Charle[1], Hector et Pompee.

                        Preux en tous fais, humble, courtois en dis,
                        Larges en dons, d’autrui bien hors d’envie,
                        Devos vers Dieu, esetre aux provres amis,
                        L’eglise amer. Faictes a vefve aye
15                    […]
                        Vueilléz l’orphelin aidier
                        Et vous gardéz de l’autrui convoitier
                        Si que pitié soit en voz fais trouvee,
                        A vo dessus tant qu’om vous puist jugier
20                    A Josué, Charle[2], Hector et Pompee.

                        Soiéz crueulx contre voz ennemis
                        Puis que la paix n’y puet estre bastie,
                        Et vous tenéz tousjours sur leur pais,
                        Que leur terre soit destruite et honnie.
25                    Verité soit en vostre bouche oye,
                        Améz d’armes le mestier,
                        Paiéz voz gens, soiéz vray justicier,
                        Lors vous sera la victoire donnee.
                        Qui ainsi fait, sembler puet de legier
30                    A Josué, Charle[3], Hector et Pompee.

[1] Ms. Charles

[2] Ms. Charles

[3] Ms. Charles