Balade 238 : Trop me merveil de l’imperfection (CCXLI)
Balade comment l’omme n’est congneu jusques a sa mort ou par aucune mutacion
Trop me merveil de l’imperfection 51c
D’entendement d’umaine creature
Qui doit avoir sens et discrettion,
Raison en soy, jugement de nature,
5 Qui po congnoit, si ce n’est d’aventure,
Le bien d’autrui, ne prouesce du corps,
Ne son proufit, dont au vivant n’a cure :
On ne congnoist l’omme jusqu’il[1] est mors.
Car j’ay leu de mainte region
10 Maint cuer vaillant qui mettoit cuer et cure
Au bien commun de vraie entencion,
Du sien asséz, et si conroit murmure
Que tout gastoit : il n’est dolour plus dure
Que de servir a peuple, car des lors
15 Que l’un mesdit, l’autre ensuit sa laidure :
On ne congnoist l’omme jusqu’il[2] est mors.
Pour ce leur sourt souvent perdicion
Se l’omme muert ou soy oster procure.
Quant autres vient d’autre condicion
20 Mal gouvernant, pueple brait et murmure
Et plaint cellui qui usoit de droiture.
Pour lui ravoir donrroient grans tresors,
Mais c’est a tart et grant mesaventure :
On ne congnoist l’omme jusqu’il[3] est mors.
L’envoy
25 Princes, dont vient tele derrision ?
Deffault de sens fait ceste abusion
Et que chascun ne veult rien mettre hors
Pour soy aidier. Pour ce, en conclusion,
Souventefoiz vient tribulacion :
30 On ne congnoist l’omme jusqu’il[4] est mors.
[1] Ms. jusques il
[2] Ms. jusques il
[3] Ms. jusques il
[4] Ms. jusques il
