Balade 238 : Je ne requier a Dieu fos qu’il me doint (CCXL)

Balade [51b] comment homme doit estre content de sa vie en ce monde

                        Je ne requier a Dieu fors qu’il me doint
                        En ce monde lui servir et loer,
                        Vivre pour moy, cote entiere ou pourpoint,
                        Aucun cheval pour mon labour porter,
5                      Et que je puisse mon estat gouverner
                        Moiennement, en grace, sanz envie,
                        Sanz trop avoir et sanz pain demander,
                        Car au jour d’ui est la plus seure vie.

                        Cilz qui trop a n’est toudis en un point,
10                    Tousjours doubte du sien perdre et gaster,
                        Cuisançon l’art, Avarice le point,
                        Et Envie lui fait le sien oster.
                        Qui sires est, il a moult a penser
                        Pour son estat et pour sa grant maisgnie.
15                    Pour ce fait bon l’estant moien mener,
                        Car au jour d’ui est la plus seure vie.

                        Qui povres est, chascun vers lui se faint.
                        Grant doleur a de son pain truander,
                        Honte le suist, Indigence le vaint.
20                    Impaciens veult son Dieu acuser.
                        Les drois civilez le veulent reprouver
                        Que creus ne soit : ainsis povres mendie.
                        Dieux nous vueille vivre et robe donner,
                        Car au jour d’ui c’est la plus seure vie.

                        L’envoy

25                    Princes, qui veult son temps vivre et durer
                        Moiennement doit son fait ordonner,
                        Sanz trop vouloir avoir grant seignourie,
                        Ne richesce, ne soufraicte porter :
                        Le moien doit vouloir et desirer,
30                    Car au jour d’ui c’est la plus seure vie.