Balade 237 : Qui est cellui, a parler proprement (CCXXXIX)
Balade que nul ne doit mesdire des anciens
Qui est cellui, a parler proprement, 51a
Qui [ce] puet bien par raison soustenir,
Que vaillance n’ait anciennement
Es vaillans cuers esté, ne maintenir
5 Que les hommes du jour d’ui
Sont plus vaillans ? Le dire est grant ennui,
Et de prouver le contraire suis prest :
Par les acteurs et livres que je lui :
Chascuns deust congnoistre quelz il est.
10 Que fist Sanson ? Voy le ou vielz Testament.
Et de Jason te doit bien souvenir,
Du roy David, d’Ercules ensement,
D’Alixandre qui tout voult conquerir.
De Cesar esbahis suy
15 Et des Romains qui regnerent, ce trui,
Quant du monde firent tout le conquest,
Des presens gens tel n’en congnois nullui :
Chascuns deust congnoistre quelz il est.
Artus, Charles, Godefroy le vaillant,
20 Maccaheus, Hestor, d’armes martir,
De conquerre ne furent onques lent,
De combattre, de chasteaulx assaillir.
Helas ! et ou est cellui
Du temps present qui ait conquis autrui,
25 Qui puist montrer un royaume d’acquest ?
Je ne le sçay. Fors Guesclin n’en congnuy :
Chascuns deust congnoistre quelz il est.
L’envoy
Princes, je dy qu’il mesprant durement
Qui ne congnoist la paine et le tourment
30 Des anciens. car qui sçauroit que c’est
Et qu’ilz firent pour nostre enseignement,
Telz les blasme qui diroit autrement :
Chascun deust congnoistre quelz il est.
