Balade 236 : Vous qui servéz de jour en jour (CCXXXVIII)

Balade de reconfort pour tous servens non guerredonnéz

                        Vous qui servéz de jour en jour
                        Et qui avéz long temps servi
                        A grant paine et a grant labour
                        Sanz avoir esté remeri,
5                      Ne vous chaille, car je vous dy,
                        Se bien servéz jusques au bout,
                        Un coup vendra qui paiera tout.

                        Homs qui veult venir a honour
                        Doit prandre humilité en ly,
10                    Loyaument servir son seignour,
                        Et qu’en orgueil ne soit ravy,
                        Soit[1] diligens : s’il fait ainsi,
                        A court pas en vain ne se crout.
                        Un coup vendra qui paiera tout.

15                    Se paiéz n’est du premier tour
                        De ce qu’il aura desservi,
                        Puet estre est ce pour le meillour.
                        Ne soit ja pour ce esbahy,
                        Car au derrain sera meri
20                    Grandement, de ce ne me doubt :
                        Un coup vendra qui paiera tout.

[1] Ms. Et soit