Balade 235 : Vous qui avéz langaige d’envoyer (CCXXXVII)

Balade contre ceulx qui se moquent des anciens

                        Vous qui avéz langaige d’envoyer
                        En blobles ceuls qui passent .l. ans,
                        Qui ne servent que d’autrui avoier,
                        De po servir et d’estre gris et blans,
5                      Aviséz vous, car tel cuide estre grans
                        Qui de son chief ne toucha onques nue.
                        [Et] telz cuide estre Oliviers et Rolans
                        Qui ne prant pas toudis ou ciel la grue.

                        On voit souvent jeusne gent foloier,
10                    Petit conseil puent donner enfans.
                        Mais se seulent toudis oultrecuider.
                        Helas ! destruit fut par eulx Roboans.
                        Sur Israel regan Jeroboans,
                        Par leur orgueil fut sa terre perdue.
15                    Adviséz vous, que telz nous est moquans                                         50d
                        Qui ne prant pas toudis ou ciel la grue.

                        Telz a chief gris qui puet bien repairier
                        En son hostel, car vignes a et champs,
                        Bonne maison, rente pour lui aisier.
20                    De blobles est asséz reconfortans.
                        Qui ainsi fait, il n’est pas nonsaichans.
                        Or vous gardéz que fortune ne rue :
                        Telz approuche criz et doleureus chans
                        Qui ne prant pas toudis ou ciel la grue.