Balade 234 : Veoir les fais et sçavoir l’escripture (CCXXXVI)

Autre Balade

                        Veoir les fais et sçavoir l’escripture,
                        Et la lettre tresententivement,
                        Quelz sont les droiz acquis et de nature,
                        Qui a esté de bon gouvernement,
5                      Qui s’est aussi gouverné folement,
                        Que vault sçavoir tout ce qui n’y prant garde ?
                        Mieulx vault cellui qui chace et rien ne prant,                                   50c
                        Car sages homs la fin voit et regarde.

                        Combien qu’il voist chascer a l’aventure,
10                    S’a il espoir de prandre aucunement
                        Ou de trouver la beste qu’il procure.
                        Et ainsis va en bon entendement.
                        Mais cilz qui list et [qui] nul bien n’aprant
                        N’en faiz d’autrui ne se mire n’esgarde,
15                    Est paresceus et vit doubteusement,
                        Car saiges homs voit la fin et esgarde.

                        Que vault grans clers ne autre creature
                        Qui ne se scet gouverner nettement,
                        Et qui ne veult mener la vie pure,
20                    Qui veult a tous preschier generaument,
                        Quant il congnoit dont viennent li tourment
                        Pour lui grever, et mie ne s’en garde ?
                        Il se destruit adventureusement,
                        Car saiges homs la fin voit et regarde.