Balade 233 : Chascun me dit : Tu te doiz bien amer (CCXXXV)
Autre Balade
Chascun me dit : « Tu te doiz bien amer,
Qui cerchié as honeur en mainte terre,
Deça les mons, ou pays d’oultre mer,
Et en tous lieus que noble cuer doit querre.
5 Et qui amas bien par amours. » Adonques 50b
Lors respons je : « Ce m’a fait po acquerre.
Que m’est il mieulx de quanque je vi onques ?"
Il est certain que j’ay veu caroler,
10 Et pour amours maint fait d’armes requerre,
En temps de paix tournoier et jouster,
Faire chançons et maint pais conquerre,
Oiseaulx voler, chiens chacer a grant erre,
Et tous deduis. Or court uns autres mondes.
15 Dire puis bien, de quoy le cuer me serre :
Que m’est il mieulx de quanque je vi onques ?
J’ay vey les Roys aux sacres couronner,
Et leurs grans cours, dont l’en doit po enquerre,
Les chevaliers sur riches draps broder
20 Leurs grans tresors de joiauls mis soubz serre.
Sui les ay. Pour ce pas ne me terre,
Rien n’ay acquis, et ne puis durer longues,
Fors que renom, c’est le vent de soulerre.
Que m’est il mieulx de quanque je vi onques ?
L’envoy
25 Prince, le temps ne puet gaires durer,
Il fault chascun a son aage finer,
Jeusnes et vieulz, [aussi] vielles et blondes,
Fors et hardiz, couars, au par[a]ler,
C’est tout neant, pour ce vueil demander :
30 Que m’est il mieulx de quanque je vi onques ?
