Balade 232 : Uns gouverneurs fut en une maison (CCXXXIV)
Autre Balade
Uns gouverneurs[1] fut en une maison
Ou serviteurs ot en grant habondance
Qui gaiges ont excessis sanz raison,
Et pour ce voult en ce mettre ordonnance.
5 Mais quant ce vint au fait de la despence, 50a
Il restraingnit eufs, chandelle et moustarde,
Et oublia pain, vin, char et finance :
Tout se destruit et par default de garde.
Es grans gaiges ne mist provision
10 Ne sur les gens dont l’ostel a grevance.
Sur les petiz fist la restrinction
Qui monte a pou, vez ci large ignorance.
Es grans cas chiet la bonne pourvoiance,
Plus despent loups que brebiz ne oustarde.
15 Au vray regart ne voy nul qui s’avance :
Tout se destruit et par default de garde.
Chascuns pense de glamer sa moisson
Et d’amasser joyaulx, or et finance.
L’en ne restraint buche, espices, boisson,
20 Chambres, ne dons, ne la desordonnance,
Fors puree, poys, cresson, mais la crance
Ont ceuls dehors, s’il est qui y prant garde[2].
Hostelz se pert par tel perseverance,
Tout se destruit et par default de garde.
L’envoy
25 Prince, qui veult vivre en temps et saison
Pour son hostel face sa garnison,
De gens d’honeur et prodommes se farde,
Ce qu’il en fault, non[3] pas trop grant foison.
S’autrement fait, lors en perdicion
30 Tout se destruit et par default de garde.
[1] Ms. gouvernement
[2] Ms. regarde
[3] Saint Hilaire édite n’on
