Balade 231 : Uns chascuns dit qu’il ne vouldroit que bien (CCXXXIII)

Autre Balade

                        Uns chascuns dit qu’il ne vouldroit que bien,
                        Et a chascun toute loyauté faire,
                        Et l’autre fit : « Amis, vouléz vous rien ?
                        Tout vostres sui, ne croiéz le contraire. »
5                      Mais Dieux scet bien puis qu’il convendroit traire
                        Ou travaillier, s’on tourneroit l’oie,
                        Car en tel cas seult on dire et retraire
                        Ainsi dit on, mais on ne le fait mie.

                        Les faiz aux dis sont de foible merrien,
10                    Car la bouche fait trop le cuer deffaire.
                        Elle promet et parole trop bien,
                        Et le cuer ment qui est proprietaire.
                        Si vaulsist mieulx souvent la bouche taire
                        Que par mentir faire au cuer villenie,
15                    Qu’a noble cuer le mentir ne doit plaire,
                        Ainsi dit on, mais on ne le fait mie.

                        Tuit li docteur et li maistre ancien
                        Dient que cuers ne se doit contrefaire,
                        Et ceste loy ont tuit li crestien
20                    Que par mentir ne se doivent meffaire.
                        Par verité doivent tout homme attraire,
                        Mais au jour d’ui ceste loy se varie.
                        Chascuns promet, croiéz cest exemplaire :
                        Ainsi dit on, mais on ne le fait mie.