Balade 230 : Renart jadis que grant faim destraignoit (CCXXXII)

Balade

Fable

                        Renart jadis que grant faim destraignoit
                        Pour proie avoir chaçoit par le boscage,
                        Tant qu’en tracent dessur un arbre voit
                        Un grant corbaut qui tenoit un frommage.
5                      Lors dist Renars par doulz humble[1] langaige :
                        « Beaus Thiesselin, c’est chose clere et voire
                        Que mieulx chantes qu’oisel du bois ramage. »
                        On se deçoit par legierement croire.

                        Car li corbauls le barat n’apperçoit,
10                    Mais voult chanter. Po fist de vassellage,
                        Tant qu’en chantant sa proye jus cheoit.
                        Renart la prist et mist a son usaige.
                        Lors apperçut le corbaut son dommaige,
                        Sanz recouvrer perdit par vaine gloire.                                              49d
15                    A ce mirer se doivent foul et saige :
                        On se deçoit par legierement croire.

                        Pluseurs gens sont en ce monde orendroit
                        Qui parlent bel pour querir adventaige.
                        Mais cil est foulz qui son fait ne congnoit,
20                    Et qui ne faint a telz gens son couraige.
                        Gay contre gay doivent estre en usaige.
                        Souviengne vous de la corneille noire
                        De qui Renars conquist le pasturage :
                        On se deçoit par legierement croire.

[1] Ms. et humble