Balade 229 : Puisque les Roys sont faiz pour gouverner (CCXXXI)

Balade

                        Puisque les Roys sont faiz pour gouverner
                        Et les princes pour leurs Roys obeir,
                        Aussi sont fais les ducs pour gens mener
                        Et aux contes commettre leur plaisir.
5                      Les chevaliers a touz ces trois servir
                        Doivent, l’eglise deffendre
                        Et le peuple, qui le veult entreprandre.
                        Doivent garder et maintenir en paix,
                        Et pour ces deux doivent leur sang espandre :
10                    Pour ce furent les Roys et princes fais.                                              49c

                        L’eglise doit pour tous Dieu reclamer,
                        Soy sainctement au monde maintenir.
                        Le peupled oit chascun jour labourer
                        Pour les estas des nobles soustenir,
15                    Et si les doit honourer et cremir,
                        Leur disme a l’Eglise rendre,
                        Les ars mondains retenir et aprandre,
                        Estre loyaulx et humbles en leurs fais.
                        Lors les doit l’en gouverner sanz mesprandre,
20                    Pour ce furent les Roys et princes fais.

                        Soit Roys songneus de son regne garder,
                        Ses barons doit et prodommes chierir,
                        Les mauvais doit d’entre les bons oster,
                        Largesce avoir, Avarice hair,
25                    Estre vaillans, sa guerre poursuir,
                        Y diligemment entendre,
                        A toute honeur et prouesce tendre,
                        Et que d’Orgueil ne soit ses corps meffaiz.
                        Qui sires est vueille cy garde prandre,
30                    Pour ce furent les Roys et princes fais.