Balade 227 : En la forest jadis noble et deserte (CCXXIX)

Balade

                        En la forest jadis noble et deserte
                        A le sanglier vermillié la fouchiere,
                        Les lis destruit et le glan mis a perte,
                        Les arbres haulz verséz en la royere.
5                      Ce qui plain fut est tourné en bruiere.
                        Li jeusne arbre ne puent revenir,
                        La forest va ce que devant derriere :
                        L’en n’y scet mais quele voie tenir.

                        Lyons, lieppars ne loups, c’est chose aperte,
10                    Levriers, mastins, n’ont levee leur chiere,
                        Mais au sanglier ont laissié voie ouverte
                        Et au renart qui est de sa banniere,
                        Tant que du bois ont tout chacié arriere
                        Ce qui devoit la forest soustenir.
15                    Du recouvrer n’y voy nulle maniere,
                        L’en n’y scet mais quelle voie tenir.

                        Mais venir doit par la sente couverte
                        Le cerf volant a la teste legiere
                        Qui au faintis doit rendre leur desserte,
20                    Et passera du sanglier la riviere.
                        L’asne pesant mettra dessoubz la biere.
                        Soubz lui se doit la fourest resjouir,                                                  49b
                        La cessera de dire la matiere :
                        L’en n’y scet mais quele voie tenir.

                        L’envoy

25                    Prince, on tendra la venue treschiere
                        Du cerf volant, de sa lignie chiere
                        Qui a vint cors doit l’asne conquerir
                        Et recouvrer sa pasture premiere.
                        Mais s’il ne vit, chascun son salut quiere :
30                    L’en ne scet mes quele voie tenir.