Balade 226 : Six choses sont qui font prince exillier (CCXXVIII)

Autre Balade

                        Six choses sont qui font prince exillier,
                        Perdre s’onneur et haine encourir :
                        Trop longuement sa guerre conseillier,
                        Estre orgueilleus, son convent non tenir,
5                      Trop convoiter, ses subgiéz asservir,
                        Paresce es fais qu’om doit hastis avoir.
                        Par ces .vi. poins se puet prince honnir.
                        Pour ce fait bon telz vices remouvoir.

                        Par longs conseilz puet terre perillier
10                    Et la puet lors l’ennemi conquerir,
                        Et par Orgueil se fait prince laissier,
                        Et si acquiert deshoneur par mentir.
                        Par Convoiter se fait par tout hair.                                                     49a
                        Par Asservir, ses subgiéz esmouvoir,
15                    Par Paresce du tout anientir,
                        Pour ce fait bon telz vices remouvoir.

                        Conseil se doit briefment expedier,
                        C’est ce qui fait la guerre secourir.
                        Humilité, souffisance traictier,
20                    Franchise amer, Verité soustenir,
                        Diligence en tous cas maintenir,
                        Car tous ces poins doit bons[1] princes sçavoir :
                        Regner en puet, par les autre fenir.
                        Pour ce fait bon telz vices remouvoir.

[1] Ms. tous bons