Balade 225 : Pour quoy pant on le lou ? Pour ce qu’il emble (CCXXVII)

Autre Balade

                        Pour quoy pant on le lou ? Pour ce qu’il emble
                        Tue et ravist plus que beste qui soit,
                        Pour ces trois cas est pandus, ce me semble,
                        Et s’est huéz d’un chascun qui le voit                                                 48d
5                      A son vivant, ne nulz ne le congnoit,
                        Mais est haiz tant que chascun le chace.
                        Qui mauvais est ci exemple prandroit :
                        Or se gart donc chascun qu’il ne mefface.

                        Homs qui a sens, doubte et raison ensemble,
10                    Grans et petiz, chascun en son endroit,
                        Doit eschiver que le lou ne ressemble,
                        Car s’il embloit, tuoit ou ravissoit,
                        Pour ces .iii. cas ou pour l’un d’eulx mourroit,
                        Et si perdroit de ce monde la grace,
15                    Et honte grant a ses amis feroit :
                        Or se gart donc chascuns qu’il ne mefface.

                        Mais qui pis est, dont tout le corps me tremble,
                        La chetive ame en grant peril seroit.
                        Pour ce est foulz qui telz crime[s] assemble
20                    Car il s’en fait partout monstrer au doit,
                        Hair aussi. Pour ce faire ne doit
                        Nulz telz meffaiz, se Dieu veult vir en face,
                        Car an chascun fera justice et droit :
                        Or se gart donc chascuns qu’il ne mefface.