Balade 223 : J’oy a .xii. ans grant ymaginative (CCXXV)

Autre Balade

                        J’oy a .xii. ans grant ymaginative,
                        Jusqu'à .xxx. ans je ne cessay d’aprandre.
                        Tous les .vii. ars oy en ma retentive,
                        Je pratiqué tant que je sceus comprandre
5                      Le ciel et les elemens,
                        Des estoilles les propres mouvemens.
                        Lors me donnoit chascun gaiges et robes.
                        Or diminue par viellesce mes sens :
                        Pardonnéz moy, car je m’en vois en blobes.

10                    Ou moien temps oy la prerogative.
                        Je sceu les loys et les decréz entendre,
                        Et soutilment arguer par logique
                        Et justement tous vrais jugemens rendre.
                        J’estoie adonc reverens,
15                    L’en m’asseoit le premier sur les rens,
                        Mais l’en me fait par derriere les bobes.
                        Je moquay tel qui m’est ores moquans :
                        Pardonnéz moi, car je m’en vois en blobes.

                        Saiges est donc qui en son temps pratique,
20                    Que povreté ne le puisse sousprandre.
                        Car qui vieulx est, chascun lui fait la nique,
                        Chascun le veult arguer et reprandre.
                        Il est a chascun chargens.
                        Or se gart lorsqu’il ne soit indigens,
25                    Qu’adonc seroit rupieus, non pas gobes.
                        Je suis moqué, ainsi sont vielle gens,
                        Pardonnéz moy, car je m’en vois en blobes.                                      48c