Balade 222 : Chose qui vient par accident soudain (CCXXIV)
Balade
Chose qui vient par accident soudain
Et violant, n’a pas longue duree.
L’eaue descent soudainement ou plain
Et semble mer par toute la contree.
5 Mais en brief temps est l’eaue consumee
Et ne remaint de tout fors le rivage
Et ledroit cours[1] de l’eaue acoustumee :
A ce mirer sedoivent foul et saige.
Joueurs de déz gaingnent tost par leur main,
10 Et tavernier comptent a la volee.
Ly advocat ont tantost leur sac plain
Et li marchant. Mais leur tierce lignee
Ne d’usuriers n’est pas continuee,
Ne de tous ceuls qui gaignent a oultrage.
15 En un moment est leur chevance alee :
A ce mirer se doivent foul et saige.
Quant acquest vient par labour de long train,
Loyaument fait, c’est chevance asseuree,
Et de telz gens doit on amer le pain,
20 Car leurs ruisseaulx nul temps ne se desree.
Toudis est un, pour ce a tous bons agree,
Et Salemon l’apreuve en son langaige.
Eaue desrivant s’est tantost enrrivee :
A ce mirer se doivent foul et saige.
L’envoy
25 Prince, trop est chevance fortunee 48b
Quant elle vient comme desordonnee,
Et a brief temps retourne a son usage.
Mais quant de viéz est a paine amassee
Et loiaument, tant plus doit estre amee :
A ce mirer sedoivent foul et saige.
[1] Ms. dours
