Balade 220 : Grant joie avint a la mainson de France (CCXXII)

Balade

                        Grant joie avint a la mainson de France
                        Quant Dieu tramist Charle, ainsné filz de Roy,
                        Ou bien duquel doit avoir esperance
                        Tout le regne pour son gentil arroy.
5                      Feste devons tuit faire de l’envoy :
                        Le dimenche des Advens,
                        Droit a Saint Pol nasquit l’an mil trois cens
                        .lx. et huit, en ce temps precieux
                        Que Jhesu Crist vint sauver toutes gens,
10                    Si en devons estre trestuit joieux.

                        Depuis qu’il vint cesser notre soufrance,
                        Nostre ennemi furent en petit ploy.                                                   47d
                        Par son naistre nous fist dieu demonstrance
                        Que la victoire venoit avec soy.
15                    Resjouy fut le peuple en bonne foy,
                        Car adonc furent perdens
                        En pluseurs lieus Anglois [et] leurs aidens,
                        Bertran de Guesclin li bons victorieus
                        Connestables, les fut persecutens,
20                    Si en devons estre trestuit joieux.

                        Trois ans aprés ceste noble naissance,
                        Nasquit Loys dont trestous biens diray.
                        En lui sera toute honour et vaillance,
                        Et de Valoys pieça conte le voy,
25                    L’ainsné daulphin. Et tient on que cil doy
                        Seront d’armes si puissans,
                        Et tant ara en eulx prouesce et sens
                        Qu’Engleterre yert destructe par l’un d’eulx.
                        Estre doivent merveilleus conquerans :
30                    Si en devons estre trestuit joieux.