Balade 218 : L’en dit qu’amis pour autre veille (CCXX)

Autre Balade  47b

                        L’en dit qu’amis pour autre veille
                        Et que mieulx vault amis qu’argent,
                        Mais amour au jour d’ui sommeille
                        Et n’a cure de povre gent.
5                      Amis n’a qui est indigent,
                        Mais a tous fait argent confort,
                        Sanz lui n’est nul avancement :
                        Amis sanz don pour autre dort.

                        Science, dont je me merveille,
10                    Benefice n’estat ne prant.
                        Donner les souverains resveille,
                        Le donner a ce a qu’il tent.
                        L’en ne pourvoit pas a present
                        A l’estat, mais au donnant fort,
15                    Ainsi se va tout corrumpant :
                        Amis sanz don pour autre dort.

                        Affinité d’argent conseille,
                        Il a estat qui fait presant.
                        De vuide main la sourde oreille.
20                    Saige prodomme ne vaillant
                        Sanz donner n’aront ja vaillant
                        D’estat mondain un petit fort.
                        Convoitise regne en disant :
                        Amis sanz don pour autre dort.

                        L’envoy

25                    Prince, au jour d’ui ly non saichant
                        Par donner ont gouvernement,
                        Benefices, chastel ou fort.
                        Dont tout va Dieux scet bien comment.
                        Ly bon n’ont rien, ne li vaillant.
30                    Amis sanz[1] don pour autre dort.

[1] Ms. sens