Balade 217 : L’en me demande chascun jour (CCXIX)

Balade a double entendement

                        L’en me demande chascun jour
                        Qu’il me semble du temps que voy,
                        Et je respons : c’est tout honour,
                        Loyauté, verité et foy,
5                      Largesce, prouesce et arroy,
                        Charité et biens qui s’advance
                        Pour le commun. mais, par ma loy,
                        Je ne di pas quanque je pence.

                        Chascuns doubte son creatour,
10                    L’un a l’autre ne fait annoy,
                        Sanz vices sont li grant seignour,
                        Au peuple ne font nul desroy.
                        Et appaisiéz se sont li Roy,
                        Cure n’ont d’or ne de finance.
15                    Guerre fault. C’est vray, or me croy :
                        Je ne di pas quanque je pence.

                        Li grant, li moyen, li menour
                        Ne sont pas chascun a par soy,
                        Mais sont conjoint en une amour
20                    Sanz rebeller, bien le congnoy,
                        Et se le contraire vous noy
                        Et mon dit n’a vraie sentence,
                        Je vous pri, pardonnéz le moi,
                        Je ne di pas quanque je pence.

                        L’envoy

25                    Prince, a court ont li bon sejour,
                        Honouréz y sont nuit et jour
                        Et li hault cuer plain de vaillance.
                        Mais ly menteur et ly flateour
                        N’y osent plus faire demour :
30                    Je ne di pas quanque je pence.