Balade 214 : Se je vouloie a droit considerer (CCXVI)

Autre Balade

                        Se je vouloie a droit considerer
                        Le temps qui est et les gens du jour d’ui,
                        Comment l’en scet faindre et dissimuler,
                        Devant blandir, derrier[1] trahir autrui,
5                      Et comment nul n’a cure de nullui
                        S’il ne scet de flaterie,
                        […]
                        Et au surplus faire tous vaillans fais,                                                  46c
                        Je voy trop bien je perdroie [la] vie :
10                    Sera toudis le monde ainsi mauvais ?

                        On ne veult mais les vaillans honourer,
                        Aux prodommes voy faire tout ennuy,
                        Les chetis voy es estas demourer
                        Et les saiges estre chascun par lui.
15                    Honeur n’a lieu, dont trop esbahis suy,
                        Las ! Veritéz est perie,
                        Po est de gent qui la vueille ne die,
                        Envie court partout a grans eslays,
                        Convoitise a sur touz la seignourie :
20                    Sera toudis le monde ainsi mauvais,

                        Nenil, ce croy. Il ne pourroit durer,
                        Car plus dolent onques estre ne lui
                        Ou il faudroit les bons leur tems finer,
                        Et leur bien vaint jouis, si come je truy.
25                    De faire diz onques ne [me] recruy,
                        Mais or n’y regarde mie,
                        Et quant je voy qu’il n’est ami n’amie,
                        Et que le bien n’est congneu desormais,
                        J’enquier atous : dictes moy, je vous prie,
30                    Sera toudis le monde ainsi mauvais ?

[1] Ms. derriere